"Pəri cadu" əsəri əsasında tamaşanın məşqlərinə başlanıldı

Sabit Rəhman adına Şəki Dövlət Dram Teatrında Əbdürrəhim bəy Haqverdiyevin “Pəri-cadu” əsəri əsasında tamaşanın məşqlərinə başlanılmışdır.
Tamaşanın quruluşçu rejissoru Mirbala Səlimli, rəssamı Qüdrət Məmmədov, musiqi tərtibatçısı İlqar Saatovdur. Əsas rolları Xanlar Həşimzadə, Akif Yusifov, Əbülfət Salahov, Sima Şabanova və başqaları ifa edirlər. Teatrda rumın dramaturqu Ejen İoneskonun “Kral ölür” əsəri üzərində də məşqlər gedir.

Teatrın direktoru Hikmət Nəbiyev bildirmişdir ki, yaradıcı kollektiv “Pəri-cadu”, habelə fransız dramaturqu Jan Batist Molyerin “Xəsis” tamaşaları ilə mayın əvvəlində paytaxt tamaşaçıları qarşısında çıxış edəcəkdir. Bundan əlavə, Şəki teatrının mayın axırlarında Türkiyənin Ankara, İstanbul, İzmir, Amasiya və digər şəhərlərinə, oktyabrda isə Rusiya paytaxtına qastrol səfərləri də planlaşdırılır. Yaradıcı kollektiv Moskva səhnəsində Səməd Vurğunun “Vaqif” dramını göstərəcəkdir.